MAI-ONA Usurbilen egindako sagardoa zen, eta Gernikako Don Tello kaleko bigarrenean kokatutako Mavi-ren ultramarinos dendan saldu zen noizbait.

Proiektu bat sortzerakoan izena bilatzea ez da lan erraza. Izen ezberdinen artean, mahaia hitza erabiltzea gure aukeretako bat zen. 2012ko urriaren erdi aldean, orandik izena erabaki barik, lokaleko giltzak jaso eta hustutzeko lanetan geundela kutxa hau aurkitu genuen. Momentu erabakigarria izan zen proiektuari izena emateko: MAI-ONA.

Baloreak

1
Ekoizleen eta bezeroen arteko transmisio lana egiten dugu. Saltzen ditugun produktuak nork nola ekoiztu dituen jakitea gustatzen zaigu. Eta jakituria hori gure bezeroei transmititzea.
2
Elikadura eredu jasangarriagoak eraikitzea ezinbestekoa da. Bertakoa, sasoikoa, eta lurrarekiko errespetuan sortzen eta merkaturatzen diren elikagaiak lehenesten ditugu.
3
Ekoizleak zaintzen ditugu. Hauenganako harremana zuzena da, bitartekariak gutxituz. Euren lan baldintzak eta oro har duintasuna ezinbestekoak dira.
4
Bezeroekiko hurbiltasuna eta laguntasuna lantzen ditugu. Produktuen aukeraketan aldez aurretik guk egindako lana baloratu eta kofidantzan oinarritutako harremanak bilatzen ditugu.
5
Komertzio txikiek bizitasuna ematen diote herriari. Herri bizi batean sinisten dugu.

Maria

Maria Agirre naiz, donostiarra naiz eta gehienetan dendan ikusiko duzuen aurpegia izango naiz. Limoi, aza, kontserba, ardo eta gazta artean. Txarkuteriaren mundua gehiago ezagutzen eta ikasten. Zuen gustuak ezagutzen, eta aukeratzen ditudan produktu kuttunei buruz hitz egiten; ekoizle berriak bilatzen, huts egiten eta berrikasten. Hau da nere pasioa, jaten dugunaren atzean dagoena ezagutzea. Zerk egiten duen gazta on bat on, zer egiten zaio mahats zukuari ardo bihurtzeko, egunero edaten dugun kafeak katilura iritsi baino lehen egindako ibilbidea ezagutzea, tostada gainean jartzen dudan mermeladaren egilearen aurpegiak.

35 urte ditut eta lanbide desberdinak edukitzeko aukera izan dut. Enpresaritza ikasi nuen, eta kultur kudeaketan espezializatu Belgikan. Harrezkero, zinema jaialdietan eta hainbat kultur proiektutan lan egin izan dut. Urteak aurrera egin ahala, gastronomiarekiko zaletasuna areagotu egin zait, eta ikasteari ekin nion beti ere lanean: sukaldean, zerbitzatzen, kudeaketan, ardoekin lanean (Donostiako Gerald’s-en, Getariako Elkanon, La Légende-en Bearn-en) … eta beti izan dut zerbait propioa sortzeko gogoa.

Esperientzia horiek denek eraman naute Mai-ona sortzera. Esperientziek eta mahai onak osatzeko daukadan pasioak. Nere denbora librean produktuak bilatzea gustatzen zait, errezeta liburuak begiratzea, brokanteetan plater politak bilatzea, lorei eta sendabelarrei buruz ikastea. Mahai politak osatu eta gonbidatuak gustura sentiaraztea, hori ere nere pasioa da.

To top